Vdekja i mbështeti për muri “Ç’bën” dhe “Alo shef”

by А С · Published 01/04/2015 · Updated 01/04/2015

Pas mbishkrimeve në mure “Shu praish” (Ç’bën), “Zdravo Gorde” ( Ç’kemi Gorede) dhe “Alo naçallnice” (Alo shef), të inspiruara nga bisedat e përgjuara, filluan të paraqiten edhe një seri me përmbajtje nacionaliste dhe me gjuhë të qartë të urrejtjes.

Te një pjesë e madhe e mbishkrimeve në mure emërim negativ i një komuniteti të caktuar etnik është fshirë dhe është ndërruar me tjetër fjalë. Për shembull, fjala e dytë te “Smrt za Shiptari” (Vdekje për shqiptarët) është zëvendësuar me fjalën “omraza” (urrejtje), ku më pas grafiku është bërë “Smrt za omraza” (Vdekje për urrejtjen).

Ndërsa, mbrëmë, lideri i VMRO-DPMNE-së, Nikolla Gruevski, në mitingun në Shtip, pikërisht liderin e opozitës, Zoran Zaev, e akuzoi që po planifikon të inskenojë tensione ndëretnike.

– Të mos lejomë që ta arrijnë finalen për të cilin ky operacion është shpikur. Të mos lejojmë të na përgjakin as në linja politike, as në ato fetare, e as në linja etnike. Të mos lejojmë të kenë sukses në skenarin që ata e kanë konstruktuar – tha Gruevski.

Analistët thonë që grafikët të cilët u paraqitën gjatë natës, me siguri janë të porositur nga qendrat politike të fuqisë, me qëllim të qartë që të shpërqendrohemi nga kritikat e ashpëra momentale për pushtetin dhe të përqendrohemi kah urrejtja ndëretnike.

– Aksionet e këtilla organizohen për të pasur efekt dridhërues, nuk është asgjë e re. Për shembull, para disa viteve, fjalët “Brat Lube” (Vllai Lube) gjatë natës u shndërruan në “Lube Predavnik” (Lube tradhtari) në të gjitha lagjet e Shkupit dhe në media. Ajo që është e re dhe na gëzon është që në vitet e fundit ka edhe dukuri të intervenimeve anti-nacionaliste mbi grafikët që hapin urrejtje – po ngjyrosen në “Smrt za nacionalizmot” (Vdekje për nacionalizmin) dhe “Smrt za shoevinizmot” (Vdekje për shovinizmin). Këto intervenime, aq sa e di unë, janë të organizuara nga grupet e lidhura me të majtën e re në Maqedoni, e cila ka karakter multietnik. Se cilët grafikë “do të fitojnë”, është rëndë të parashikohet – thotë Sllobodan Jaqoski, analist i komunikimit.

Grafikët sipas përmbajtjes mund të shërbejnë si rrëfyes për gjendjen e një shoqërie – thotë Bardhyl Jashari, drejtor i Fondacionit për Shoqëri Informatike “Metamorfozis”.

– Ata shpesh janë reflektim i ngjarjeve aktuale, si për shembull, siç janë grafikët që përmbajnë fragmente nga “bombat” e publikuara të Zaevit. Kuptohet që grafikët gjithashtu mund të shërbejnë si dhënie e mesazheve në mënyrë publike të cilat shkaktojnë urrejtje dhe mendoj që grafikët të cilët u shfaqën kohëve të fundit kundër shqiptarëve po përdoren për manipulim dhe shpërqendrim prej problemeve reale duke nxitur urrejtje por edhe frikë “duke rikujtuar rrezikun e vazhdueshëm” për Maqedoninë dhe maqedonasit. Grafikët e këtillë janë paraqitur vazhdimisht me intensitet herë më të madh e herë më të vogël varësisht prej kontekstit politik dhe janë si “dekor” i vazhdueshëm që i shoqëron në çdo zgjedhje, prandaj mendoj që ndoshta janë pjesë e kampanjave partiake për përgatitje për zgjedhje. Prapëseprapë, reagimi me fshirjen e grafikëve të elementeve për urrejtje është inspirim dhe jep shpresë se manipulimet e këtilla në të ardhmen do të kenë efekt më të vogël – tha Jashari.

Në këtë aksion për shpërqendrimin e opinionit publik prej krizës aktuale politike mund të konsiderohen edhe komentet e ashpra për dokumentarin e “Al Xhazirës”, “Njerëz dhe fuqia : Maqedonia – prapa fasadës“, i transmetuar menjëherë pas intervistës me Zorasn Zaevin, por edhe komentet e ngjashme të bëra për propozimin që një shqiptar të bëhet kryeministër i Maqedonisë, të cilat u paraqitën në anketën e gazetës javore “Fokus”.